Tap luk pan mi
Yu ed fieva kuoknat brosh
an yu lang an lenki-lenki laka bruum-tik
yu kyuut til yu zogli
onggli a mongki kuda lov yu
Yu kyaahn sumail?
yu a skruu op yu fies laik yu a si dong pan tailit a tek a shit
no wanda di gyal dem waak paas yu
bot luk pan yu tiit dem tu
dem luk twis-op twis-op laka Misa Mac Jakass uon
Mi nek!
ou mi figet yu nuoz
luk laka frai bami wid tuu big uol
Bwai wa mi fi du wid yu?
bai likl kriim fi mek yu ier luk nais?
fens op yu tiit?
Mi se tap luk pan mi!
yu sik mi beli…
Wel yu beta jringk som serosi an ton yu bak
kaaz az lang az yu luk ina di mira a mi yu ago si.
Andre Che Sherriah is a linguist and tutor. Readers may refer to his other poem, 'Mada Niecha' , for the Creole system in which both poems are written.
